சினிமா தயாரிப்பாளர் : யோவ் டைரக்டர், அந்த ஹீரோ வேசத்துக்கு, அந்த ஆளை ஏன்யா போடற? வேணும்னா உன்னோட திருப்திக்கு, அந்த ஹீரோ சாயல்ல உள்ள புது பையனை தேடிப் பிடிச்சி போடுயா. அந்த ஹீரோவுக்கு கொடுக்குற சம்பளத்தில் நாம நாலு படமே எடுத்துடலாம்.
டைரக்டர் : அப்படினா என் மகனையே ஹீரோவா போட்டுடலாமா சார்? ஒரு ரூபாய் கூட சம்பளமே வேணாம்.
முடிவு 1 : படம் சக்கை போடு போட்டது, டைரக்டர், தன் மகனோட படம் என்பதால் பார்த்து பார்த்து செய்து மெனக்கெட்டார். ஒரே நாளில் வசூலான தொகையில், மகிழ்ச்சியான தயாரிப்பாளர், அடுத்த படத்திற்கும் உன் மகனையே ஹீரோவா போடு என்றார்.
டிவிஸ்ட் 1 : சார்... ரொம்ப சந்தோசம், அப்படியே இன்னொரு விசயம், என் ரெண்டாவது பையன் எப்பப் பார்த்தாலும் மியூசிக், பாட்டு, ஆல்பம் னு வெறியா இருக்கான், ஒரு தடவை அவனோட மியூசிக் கேளுங்க.
முடிவு 2 : மியூசிக் ஆல்பம், செமையா இருந்தது, தயாரிப்பாளர் ரொம்ப குஷியாகி, இந்த படத்தில் இசையமைப்பாளரா போட்டுவிட்டார். சம்பளம் குறைவு என்பதால், தயாரிப்பாளருக்கு குஷி.
டிவிஸ்ட் 2: வீட்டுக்கு வந்த டைரக்டர், ஒரு மகனை ஹீரோ ஆக்கிட்டோம், இரண்டாவது மகனை இசையமைப்பாளரா ஆக்கிட்டோம், ஆனால், மூனாவது மகன், பொறுப்பு இல்லாமல் ....."வந்தால் டைரக்டராகத் தான் வருவேன்னு" சுத்திட்டு இருக்கானேன்னு, ஆதங்கத்தில் இரவெல்லாம் யோசித்து, தூக்கம் வராமல் புரண்டு படுத்தவர், அப்படியே ஹார்ட் அட்டாக்ல உயிரை விட்டார்.
முடிவு 3 : எப்படியாச்சி, என்னாச்சி, எதனால னு கேட்டு வந்தவங்க எல்லாம் துக்கம் விசாரிச்சப்ப, ஒரே ஒரு மனிதரின் உள்ளமோ..இனி எப்படி என் படத்தை முடிப்பேன், இந்த டைரக்டர் கூடவே இருப்பதால், மற்ற டைரக்டரை கூட அலட்சியப்படுத்தினேனே என உள்ளே புலம்பி வெளியே கண்ணீர் விட்டார்.
டிவிஸ்ட் 3 : அப்பாவின் காரியம் முடிந்ததும், தயாரிப்பாளரிடம் வந்த இயக்குனரின் மூன்று பிள்ளைகளும், தயாரிப்பாளரிடம், சார் எங்க அப்பாவின் கடமையை நாங்க நிறைவேற்றுவோம் னு சொன்னார்கள். சரிப்பா சந்தோசம், ஆனால் டைரக்டருக்கு எங்கே போவேன்? சார் அந்த கவலையே வேண்டாம், இதோ இவன் தான் கடைசி தம்பி, பத்து குறும்படம் பண்ணியிருக்கான், அப்பா எழுதி வைத்துள்ள கதையை கூட படித்துள்ளான். நீங்க கவலையை விடுங்க.
முடிவு 4 : படம் எடுக்கிற விதத்தில் அப்பனையே மிஞ்சிவிட்டான் மகன், தயாரிப்பாளருக்கு ரொம்ப சந்தோசம். டைரக்டரோட பசங்க உயிரை கொடுத்து படத்தை எடுக்கறாங்களே, அவங்க சொந்தப் படம் போல என மகிழ்ந்தார்.
டிவிஸ்ட் 4 : டாக்டர் என்ன சொல்றீங்க? ஆமாம் டைரக்டர் சார், உங்க உடம்பு கெட்டுப்போச்சி, குடிச்சி, குடிச்சியே நுரையீரலும் போயிடுச்சி. உங்க 3 பிள்ளைகளுக்கும் ஏதாவது செய்துடுங்க, அப்ப தான் இத்தனை வருசமா சினிமா பீல்ட்ல நீங்க இருந்ததன் அடையாளம். மிஞ்சி போனால் ஒரு வருசம் கூட உங்க உடம்பு தாங்காது, இதை நான் ஏன் உங்க கிட்டே சொல்றேன்னா எதார்த்தத்தை நீங்களே புரிஞ்சிக்கனும். அந்த பசங்களை கூப்பிட்டு சொன்னால் நொடிஞ்சிடுவாங்க. அதான் சொல்கிறேன். ரொம்ப நன்றி டாக்டர். இறப்பதற்கு முன் சரியாக மூன்றாவது மாதத்தில் இருந்து ஒவ்வொரு செயலையும் பிளான் பண்ணி, தயாரிப்பாளர் தயவில் நிறைவேற்றியும் விட்டார், உயிர் விடும் முன் மொத்த கதையையும் மூன்றாவது மகனிடம் திணித்தும் விட்டார்.
+++++ முற்றும்+++++
எழுத்தாளர் இளங்கோவன்
சென்னை, 09-03-2022, 09:13 am.